Молитвы ко господу об исцелении

Владыко Вседержителю, Святый Царю, наказуяй и не умер-щвляяй, утверждаяй низпадающия, возводяй низверженныя, телесныя человеков скорби исправляя и, молимся Тебе, Боже наш, раба Твоего (имя), немощствующа посети милостию Твоею, прости ему всякое согрешение вольное и невольное. Ей, Господи, врачебную Твою силу с небесе низпосли, прикос-нися телеси, угаси огневицу, укроти страсть и всякую немощь таящуюся, буди врач раба Твоего (имя), воздвигни его от одра болезненнаго, и от ложа озлобления цела и всесовершенна, даруй его Церкви Твоей благоугождающа и творяща волю Твою, Твое бо есть, еже миловати и спасати ны, Боже наш, и Тебе славу возсылаем. Отцу, и Сыну, и Святому Духу, ныне и присно, и во веки веков, аминь.

Владыка Вседержителю, Врачу душ и телес наших, смиряяй и возносяй, наказуяй и паки исцеляяй! Раба Твоего (имя) немощствующа посети и исцели его, возставив от одра и немощи. Запрети духу немощи, остави от него всяку язву, всяку болезнь, и еже есть в нем согрешение или беззаконие, ослаби, остави, прости Твоего ради человеколюбия. Ей, Господи, пощади создание Твое во Христе Иисусе, Господе нашем, с Ним же благословен еси, и со Пресвятым, и Благам, и Животворящим Твоим Духом, ныне и присно и во веки веков. Аминь.

Боже сильный милостию, строяй вся на спасение роду человеческому, посети раба Своего сего (имя), нарицающа имя Христа Твоего, исцели его от всякаго недуга плотскаго и отпусти грехи и греховные соблазны, и всяку напасть, и всякое нашествие неприязненно далече сотвори от раба Твоего, и воздвигай от одра греховнаго, и устрой его во святую Твою Церковь здрава душею и телом и делы добрыми славящаго со всеми людьми имя Христа Твоего, яко Тебе славу возсылаем, со безначальным Ти Сыном, и со Святым Духом ныне и присно и во веки веков. Аминь. Боже, очисти мя грешнаго и помилуй мя!